Dat Grünnungsfest vun de Nordkark un de Plattdüütschen
06. Juni 2022
Klock halvi fi ef, fröh an’n Morgen gung dat los. De Bus vun de Karkenkreisjugend hoolte mi in Bredstedt af un nehm mi mit nah Ratzborg. Denn dor schull dat Grünnungsfest vun de Nordkark fi ert warrn. Al inne Januar worr ik fraagt: „Wöllt jem dor nich ok mitmaken?“ Dat weer gor keen Fraag, natürli wulln wi ok dorbi ween.
Denn Plattdüütsch höört to uns Nordkark dorto. An’ne Westküst vun Sleswig-Holsteen, in Hamborg, in Schwerin, anne Barther Bodden, in Rostock un Pommern: Överall warrd plattdüütsch schnackt.
Lang nich mehr so veel as noch vör 30, 40 Johrn. Aver liekers höört Plattdüütsch dor mit to. De Lüüd kaamt geern to plattdüütsch Goddesdeenste to’t Dörpsfest, to’t Jubiläum vun de Füüerwehr un to’t Aarndankfest. Hochtieden warrd op Platt fi ert, Kinddööpen un Truuerfi ern. Wenn de Paster bi’t Seelsorgegespräch platt schnackt, denn sluut dat dat Hart vun de anner op. Dat Meckelbörger Platt un dat Platt in Pommern höört sik anners an as dat Platt in Hamborg un in Husum. Dor heet dat „Kauh“ un nich „Koh“, de Lüüd gaht to „Kirch“ un nich to „Kark“. Aver liekers verstaht wi uns.
De Spraak knütt uns tosamen
De Spraak knütt uns tosamen. Dat weer al in de Jahrn vör de Nordkark so. Jede Jahr inne Januar kaamt de Plattdüütschen tohoop in Ratzborg to’t Plattdüütsch Pastoralkolleg. Jümmers weern dor Nordelbier, Meckelbörger un Pommern mit dorbi. Wi hebbt dat tosamen leevt, wat denn mit de Nordkark keem. De plattdüütsch Spraak is „identitätsstiftend“, as dat op Hoochdüütsch heet. Dat höört eenfach to uns dorto.
Un dor wörr wat fehlen, wenn Plattdüütsch nich een faste Oort in uns Kark harr! So geev dat denn op dat Grünnungsfest een „Plattdüütsch Stünn“ in Ratzborg. De Bus hett mi to’t Oole Kino bröcht. Ik harr Lüüd ut Hamborg, ut Bad Doberan un Nordfreesland anschnackt: „Hest du Lust un maken dor mit?“ Un all hebbt toseggt. Wi hebbt sungen un miteenanner schnackt.
Mit een frohe Hart wedder nah Huus
Pasters, Lektoren un Prädikanten hebbt vun de Arbeid vun „Plattdüütsch in de Kark“ vertellt. Bannig freit hett mi, dat sogor Peter Harry Carstensen, dormols Ministerpräsident vun Sleswig-Holsteen, mit bi uns weer. Un de Saal weer full! De Lüüd hebbt markt, wo wichdi Plattdüütsch för de Nordkark is. So bün ik de Aabend denn mööd, aver mit een frohe Hart wedder nah Huus fahrt. Wi Plattdüütschen harrn uns good wiest.
Dat is allens nu teihn Jahr her. Intwüschen bün ik Öllermann för Plattdüütsch in de Nordkark. Wi hebbt mitarbeidet bi’t Biheft vun’t Gesangbook „Himmel, Erde, Luft und Meer“, un dor sünd nu 20 plattdüütsche Leeder binn’n. In all de Klangfarven, de Platt in uns Nordkark hett. Wenn dor en groote Goddesdeenst fiert warrd, wies ik dor geern op hen: „Denk an de Plattdüütschen!“ Af un to mutt ik dor jümmer twee- oder ok dreemol seggen, aver „Anhoolen deit kriegen!“ heet dat bi uns.
Goode Nahricht op Platt
De Tosamenarbeid mit de Plattdüütschen in de dree Plattdüütsch Arbeidskrinks vun uns Kark is noch enger worrn. Un wi versöökt op niee Wegen, de Goode Nahricht op Platt de Minschen neeg to bringen. Dor geev Gott wiederhen sien Segen to!
